Për shkak të përkeqësimit të kushteve atmosferike, Kapiteneria e Portit Detar të Vlorës ka vendosur pezullimin e përkohshëm të lundrimeve për mjetet e vogla lundruese dhe ato të peshkimit.
Vendimi është marrë për ditën e sotme, të enjten, 17 prill 2025, për të garantuar sigurinë në det.
Sipas njoftimit zyrtar, në zonën brenda dhe jashtë gjirit të Vlorës parashikohet erë e fortë me drejtim jug-juglindje dhe shpejtësi që arrin deri në 15-20 metra në sekondë, shoqëruar me dallgë të larta që variojnë nga 1.5 deri në 2 metra.
Në këtë kuadër, autoriteti portual ka ndaluar dhënien e lejeve për dalje në det të mjeteve të vogla dhe atyre të peshkimit që prej orëve të para të mëngjesit.
Megjithatë, linjat e transportit detar ndërkombëtar për pasagjerë dhe automjete, që operojnë në linjën Vlorë–Brindisi–Vlorë, do të vijojnë funksionimin normal, pa ndërprerje të udhëtimeve.
Përmirësimi i motit pritet të ndodhë në orët e para të mbrëmjes së sotme.
