Petrit Vasili: Grabitje tronditëse me investimet e Rilindjes

Petrit Vasili, në një deklaratë të fundit, ka denoncuar ashpër koston e lartë dhe të papërfunduar të tunelit të Llogarasë, duke e krahasuar atë me dy tunelet në Kroaci, Sveti Rok dhe Mala Kapela, për të zbardhur skandalin financiar.
“Është vërtetë tronditëse grabitja që ndodh me investimet e rilindjes,” deklaroi Vasili, duke nënvizuar se tuneli i Llogarasë është një shembull i qartë i keqmenaxhimit dhe korrupsionit në ndërtimet infrastrukturore në Shqipëri.
Sipas Vasilit, dy tunelet në Kroaci, Sveti Rok dhe Mala Kapela, të cilat kanë një gjatësi të përgjithshme prej 11.5 km dhe janë të pajisura me katër dhe gjashtë kalime përkatësisht, kanë kushtuar vetëm 170 milionë euro. Nga ana tjetër, tuneli i Llogarasë, me një gjatësi prej 5.9 km dhe vetëm dy kalime (njëri për emergjenca), ka kushtuar 200 milionë euro dhe ende nuk është përfunduar, me pritshmëri për kosto shtesë.
Vasili theksoi se tuneli i Llogarasë ka një shpejtësi maksimale prej 60-80 km/orë, ndërsa dy tunelet kroate lejojnë një shpejtësi prej 100 km/orë. Për më tepër, kapaciteti ditor i tunelit të Llogarasë është vetëm 7,000 makina në sezon, në krahasim me mbi 32,000 makina në ditë për secilin nga tunelet kroate.
“Tuneli i Llogarasë pra është sa 20% e kapacitetit të këtyre dy tuneleve në Kroaci dhe kushton më shumë se ata të dy bashkë,” tha Vasili, duke kërkuar një hetim të menjëhershëm nga SPAK. “SPAK duhet të ishte që dje tek tuneli për të filluar hetimin e kësaj plaçkitjeje kaq të trashë ditën për diell.”