Peshkaqenët po shkojnë drejt zhdukjes në ujërat e Mesdheut, duke përfshirë detin Adriatik dhe e gjithë kjo për shkak të peshkimit të pakujdesshëm.
Shpesh kemi parë foto të peshkatarëve shqiptarë me peshkaqenë që kanë rënë në rrjetat e tyre, ndaj Instituti për Mbrojtjen e Natyrës u ka bërë thirrje mediave për të mos bërë publik këtë lloj gjahu.
Mirëpo faji nuk anon nga peshkatarët, por tek legjislacioni shqiptar.
Asnjë ligj për mbrojtjen e peshkaqenëve!
Pavarësisht se prej kohësh është ngritur alarmi për zhdukjen e peshkaqenëve, nuk ka asnjë udhëzim në lidhje me peshkimin dhe si duhen mbrojtur këto specie.
Anëtari i Shoqatës së Peshkimit Durrës, Klodian Kapiti, ka treguar për “Report Tv”, se në shoqatën e tyre nuk ka pasur kurrë një udhëzim se si duhet të veprojnë peshkatarët nëse në rrjetën e tyre bie ndonjë peshkaqen.
Gjithashtu ai ka shtuar se nga institucionet shtetërore nuk është bërë asnjë hap për hartimin e një ligji për ndalimin e gjuetisë së peshkaqenëve, njësoj siç veprohet me breshkat e detit.
“Të jem i sinqertë nuk na ka ardhur ndonjë shkresë që gjuetia ndalohet. Sepse barkat nuk dalin për të gjuajtur peshkaqen. Masat dërrmuese e flotës shqiptare ka barka me trata fundore dhe nuk arrin ta kuptoj peshkatari, ekuipazhi i anijes kur trata është në fund të detit për katër orë që bën atë kalatën që i themi ne, ose programin e gjuetisë të kuptojë dhe të marri vesh se ça ka hyrë aty në tratë. Në qoftë se kjo del me një formë ligjore, patjetër që do e respektojmë”,- ka thënë Kapiti.
Gjuetia e peshkaqenëve e rrezikshme për ndryshimet klimaterike!
Ekspertët thonë se nëse ne duam të shpëtojmë planetin tonë, duhet të lëmë peshkaqenët dhe të gjithë peshqit e tjerë të mëdhenj të jetojnë të lirë.
Kërkimet e fundit thonë se trendet e peshkimit duhet të përmirësohen dhe peshqit e mëdhenj duhet të jetojnë pa kërcënimin e gjuetisë dhe kështu ata do të vazhdojnë të kenë rolin e grumbullimit të karbonit në oqean edhe pasi ngordhin.
Peshqit e mëdhenj thithin emetimet e gazrave serrë dhe i transferojnë në shtratin e oqeanit kur ngordhin dhe në këtë mënyrë ngadalësojnë procesin e ngrohjes globale. Peshkaqenët dhe peshqit e mëdhenj janë të rëndësishëm jo vetëm për ekosistemin ujor, por edhe për mbijetesën e racës njerëzore.
Kur një peshk ngordh ai zhytet në fund të detit dhe aty lëshon karbonin që ka thithur.
Ndërsa në momentin që peshkaqenët kapen nga peshkatarët, karboni që mban në trup lëshohet pjesërisht në atmosferë si dyoksid karboni disa ditë ose javë më pas.
/Burimi: Iconstyle.al/GazetaReforma.com/
