Ditën e sotme ka rënë në prangat e policisë një 41-vjeçar në Shkodër. Bëhet e ditur se qytetari me inicialet E.R kishte përshtatur lokalin që administronte në një sallë pokeri. Gjatë operacionit, Policia sekuestroi një tavolinë Pokeri, çipsa dhe letra bixhozi.
Njoftimi i Policisë:
Shkodër/Vijon operacioni policor i koduar “Fati i lojërave”, sekuestrohen një tavolinë Pokeri, çipsa dhe letra bixhozi.
Kishte vënë lokalin që administronte, në dispozicion të organizimit të lojës Poker, arrestohet në flagrancë 41-vjeçari.
Sherbimet e Komisariatit të Policisë Shkodër, si rezultat i administrimit të menjëhershëm të informacioneve të siguruara nga inteligjenca informative, për një rast të vënies së një ambienti, në vendin e quajtur “Ura Dervishbeg”, në dispozicion të organizimit të kundërligjshëm të lojërave të fatit, kanë goditur një tjetër rast të këtyre paligjshmërive.
Për këtë rast, në kuadër të operacionit policor të koduar “Fati i lojërave”, u arrestua në flagrancë shtetasi:
-E. R., 41 vjeç, banues në Shkodër.
Shërbimet e Policisë kanë konstatuar se 41-vjeçari kishte përshtatur lokalin që administronte, për organizimin e kundërligjshëm të lojës Poker. Nga ky ambient, u sekuestruan në cilësinë e provës materiale, një tavolinë Pokeri, çipsa dhe letra bixhozi.
Materialet procedurale i kaluan Prokurorisë pranë Gjykatës se Rrethit Gjyqësor Shkodër, për veprime të mëtejshme.
