Një përplasje e rëndë pas mesnate në fshatin Gjashtë të Sarandës, e nisur si një konflikt për një borxh, përshkallëzoi në të shtëna me armë zjarri dhe dhunë me sende të forta.
Ngjarja përfundoi me dy persona të plagosur dhe arrestimin e 8 të dyshuarve, përfshirë katër punonjës policie.
Nga hetimet paraprake, të kryera nga Prokuroria e Sarandës në bashkëpunim me Agjencinë e Mbikëqyrjes Policore (AMP) dhe Policinë Lokale, rezulton se:
• Katër prej personave të përfshirë janë efektivë policie:
• Alvaro Sulejmani, efektiv në Komisariatin e Policisë Himarë
• Kidi Sulejmani, efektiv në Policinë Kufitare Sarandë
• Ergis Sulejmani, efektiv në Policinë Kufitare Sarandë
• Redi Sulejmani, student në Akademinë e Policisë në Tiranë
• Një tjetër i përfshirë është Igli Duka, ish-efektiv i Policisë Sarandë, i arrestuar më herët në Skoci për kultivim të lëndëve narkotike.
Dy persona, të afërm dhe miq të të arrestuarve, janë shpallur në kërkim, ndërsa dy të tjerë janë proceduar në gjendje të lirë për shkak të rolit të tyre më të vogël në incident.
Të plagosur mbetën vëllezërit Enea dhe Albi Nexhipi, të cilët pas marrjes së ndihmës mjekësore në Spitalin e Sarandës u shoqëruan në komisariat për sqarime. Në vendngjarje janë gjetur gëzhoja pistolete dhe dy automjete të dëmtuara. Policia, e lajmëruar për konfliktin, hasi në rezistencë nga të dyshuarit, të cilët arritën të largoheshin.
Nga dëshmitë dhe pamjet e kamerave të sigurisë, janë identifikuar deri tani 12 persona të përfshirë. Dy nga të dyshuarit, Alvaro Sulejmani dhe Beqir Cocka, janë dorëzuar vullnetarisht në Komisariatin e Sarandës, ndërsa një tjetër, Mihal Sulejmani, është paraqitur gjithashtu për hetime.
Drejtoria Vendore e Policisë Vlorë ka reaguar lidhur me një video të publikuar në rrjetet sociale, ku shfaqet një inspektor i Policisë, A. I., duke mbajtur armën e shërbimit gjatë një mosmarrëveshjeje verbale në Ksamil. Pas publikimit të rastit, inspektori është pezulluar menjëherë nga detyra, ndërkohë që është nisur një hetim disiplinor për të sqaruar plotësisht rrethanat e ngjarjes.
