Mbrëmjen e sotme edhe Nënkryetari i Partisë Demokratike, Enkelejd Alibeaj ka komentuar përplasjen që ka ndodhur në selinë e PD-së mes Evi Kokalarit dhe dy mbështetësve të Kryedemokratit Lulzim Basha. Një përplasje e papritur dhe e papranueshme për Evin e cila nuk duhej të kishte përfunduar në atë gjendje sipas Alibeaj. I ftuar në emisionin “Open” në Top Channel, Alibeaj tha se të dyja zonjat që u përplasën me Kokalarin i njeh, duke i cilësuar ato si militante të PD-së.
Po ashtu, Alibeaj u shpreh se të dyja gratë nuk kanë marrë asnjë gjë nga kjo parti, duke shtuar se i përdorin ato për fushata dhe protesta të ndryshme.
“Të dyja ato zonjat unë i njoh, edhe Dritën, edhe Violetën. Ju tregoj edhe historitë e tyre të dhimbshme, të Dritës, ka kaq kohë militante e PD-së që s’ka marrë asgjë nga kjo parti, që vetëm sa herë e thërrasim ne në fushata, në protesta, kudo, është e para që vjen. E njëjta gjë edhe me Violetën. Një njeri që s’ka asgjë në familjen e vet, varfëria e ka mbuluar kudo. Militantët, ata që ne i përdorim nëpër fushata, u ledhatojmë supet, ndërkohë i krijojmë këtë lloj keqkuptimi të madh”, tha Alibeaj.
