Mbledhja e sotme e Këshillit Bashkiak të Tiranës është shoqëruar me tensione të larta dhe konfrontim gati fizik. Tedi Blushi i ka fluturuar disa letra Erion Veliajn në fytyrë.
Kryebashkiaku Erion Veliaj reagoi zyrtarisht pas tensioneve, duke theksuar se mbledhja kishte për qëllim votimin e disa nismave të rëndësishme për qytetin. “Sot Këshilli Bashkiak kish për të votuar hapjen e dy çerdheve të reja, abonetë falas për studentët, miratimin e shkollës Ecole 42 për të rinjtë, zonën e lirë ekonomike TEDA për 5 mijë vende pune të reja dhe grantin e Katarit për sheshin fundor tek Bulevardi i Ri,” tha Veliaj.
Veliaj akuzoi Ilir Metën dhe mbështetësit e tij për krijimin e tensioneve. “Por Ilir Meta dhe rrugaçi i fundit që i ka mbetur, nuk e përballojnë dot as suksesin e Tiranës dhe as humbjen kolosale të partickës së tyre. Sjellja për vandali ndaj kolegëve këshilltarë është shenjë dëshpërimi, jo forcë,” u shpreh ai.
Kryebashkiaku premtoi se do të kërkojë zbatimin e ligjit me përpikmëri që “rrugaçëria të marrë përgjigjen që meriton” dhe se Tirana nuk do të mbetet peng i “maktheve të Ilir Metës e mjeranëve të tij”.
