Një numër i madh efektivësh dhe një grup i RENEA-s kanë zbarkuar në qendër të Mamurrasit. Mësohet se policia po sekuestron pamjet e kamerave të sigurisë, pranë vendit ku ndodhi përplasja mes policëve dhe personave që nuk iu bindën urdhrit. Ndër të tjera mësohet se janë shoqëruar në Komisariatin e Policisë 7 persona. Kujtojmë se pak më parë gjatë një përplasje të armatosur, ngelën të plagosur dy efektivë policie Ilir Zeka dhe Flamur Lleja, gjithashtu edhe shtetasi Nikoll Vorfi.
Të tre personat janë dërguar në spitalin e Lezhës ku dhe po marrin ndihmën e nevojshme mjekësore, ata ndodhen jashtë rrezikut për jetën. Nga informacionet e para dyshohet se ka pasur një shkëmbim zjarri mes policisë dhe autorëve. Konfliktet kanë nisur për motive banale dhe për momentin nuk ka detaje të tjera se pse ka nisur konflikti.
Ndërkohë mësohet që kreu i Policisë së Shtetit, Ardi Veliu dhe drejtori i Policisë Kriminale, Tonin Vocaj gjithashtu edhe forca të Ndërhyrjes së Shpejt në Shkodër, janë nisur këtë mesditë drejt Mamurrasit, aty ku u plagosën dy policisë dhe një qytetar, pas shkëmbimit të zjarrit me një grup personash.Theksohet se FNSH Shkodër ka shkuar për t’i ardhur në ndihmë policisë lokale në identifikimin dhe kapjen e autorëve. Gjithashtu, në vendngjarje ka mbërritur grupi hetimor nën drejtimin e Prokurorisë për të sqaruar rrethanat e ngjarjes. Mësohet se policia ka ngritur menjëherë pika kontrolli në disa akse rrugore.
