Është dhënë sot vendimi për 60-vjeçarin Mhill Gega i cili pak ditë më parë përplasi për vdekje 68-vjeçarin Mark Gjeta në Mirëditë. Gjykata e Lezhës vendosi për Mhill Gegën masën e sigurisë “arrest me burg”.
60-vjeçari është shprehur i penduar në sallën e gjyqit, ndërsa ka thënë se ngjarja ka ndodhur teksa ai ishte në gjaknxehëtsi e sipër. Ndër të tjera Gega ka ndryshuar edhe versionin e tij të dejklaratës në gjyktaë dhe ka thënë se nuk ka dashur ta përplasë me makinë Gjetën, por nuk ka mundur të frenonte pasi makina ka rrëshqitur si pasojë e akullit.
Ngjarja e rëndë ndodhi pak ditë më parë në fshatin Bungaj të Mirëditës, ku Gega përplasi qëllimisht për vdekje Mark Gjetën me të cilin kishin punuar më parë në një ndërmarrje. Ata kishin pasur me njëri-tjetrin konflikte prej një viti për të cilat ishin shoqruar edhe në polici. Pas një konflikti verbal e fizik në mesditën e 17 shkurtit, Mhill Gega mori mjetin e tij tip Benz dhe përplasi për vdekje 68-vjeçarin Gjeta, i cili ndërroi jetë në vend si pasojë e plagëve të marra. Fillimisht policia e raporti ngjarjen si aksident, por pasi u zbuluan rrethanat Gega u arrestua dhe tashmë po përballet me drejtësinë.
