Pasditen e sotme një aksident i rëndë ka ndodhur në aksin rrugor Gjirokastër-Tepelenë. Si pasojë janë plagosur 4 personat, përfshirë edhe drejtuesit e dy mjeteve.
Bëhet me dije se janë lënduar drejtuesit e mjeteve respektive, si dhe dy pasagjerë të cilët janë dërguar menjëherë në Spitalin e Gjirokastrës për mjekim të specializuar. Konkretisht ngjarja është shënuar në Urën e Kardhiqit, në kthesën që të çon drejt rrugës së re për në Sarandë.
Një automjet “Mercedez-Benz” duket se i ka prerë rrugën një automjeti tjetër me targa AB704CR. Theksojmë se përplasja ka qenë jo frontale, por anësore gjë e cila ka shmangur një tragjedi të mundshmë. Policia Rrugore ndodhet në vendngjarje për të zbardhur shkakun e aksidentit.
Vlen të theksojmë se fluksi i emigrantëve që vijnë gjatë sezonit të verës, bëhet shkak për shtimin e numrit të aksidenteve në rrugë. Gjithashtu emigrantët zënë vendin e parë edhe për numrin e të aksidentuarve në vend gjatë këtij sezoni veror. Kjo vjen për shkak të pakujdesisë së tyre dhe moszbatimit të rregullave të qarkullimit rrugor.
Sipas INSTAT, aksidentet rrugore, në 90,8 % të rasteve, kanë ndodhur si pasojë e sjelljes së drejtuesit të mjetit. Në gjashtëmujorin e parë të vitit 2022, numërohen 581 aksidente rrugore nga ku numri i të aksidentuarve është 821 persona dhe numri i të vdekurve nga aksidentet rrugore është 89 persona.
