Një incident është shënuar gjatë procesit të votimit në Fushë Milot, ku në oborrin e shkollës 9-vjeçare “28 Nëntori” ku ndodhet qendra e votimit nr. 0871 ka ndodhur një përplasje mes dy personave.
Sipas burimeve nga terreni, shtetasit Kastriot (Preng) Perdoda dhe Asti Lleshi janë përfshirë fillimisht në një debat verbal brenda perimetrit të sigurisë së qendrës së votimit, i cili më pas është zhvendosur dhe përshkallëzuar jashtë këtij territori. Konflikti dyshohet të ketë përfshirë përfaqësues të dy fiseve.
Raportime të pakonfirmuara sugjerojnë se Perdoda mund të ketë qëlluar një herë në ajër me armë zjarri jashtë perimetrit të votimit.
Në vendngjarje kanë mbërritur forcat e policisë, të cilat po punojnë për të verifikuar ngjarjen dhe për të sqaruar plotësisht rrethanat.
