Të paktën 89 persona kanë humbur jetën nga përmbytjet katastrofale që kanë përfshirë zonën e Teksasit Qendror.
Një nga tragjeditë më të mëdha ndodhi në kampin veror vetëm për vajza “Mystic”, pranë lumit Guadalupe, ku 27 kampistë dhe këshilltarë humbën jetën gjatë përmbytjeve të fundjavës. Dhjetë persona, mes tyre 10 kampistë dhe një këshilltar, vazhdojnë të jenë të zhdukur.
Ekipet e shpëtimit po vijojnë kërkimet për dhjetëra persona të zhdukur, ndërsa autoritetet njoftojnë se situata po përshkallëzohet në një krizë humanitare serioze.
Përmbytjet kanë goditur gjashtë qarqe të Teksasit, ku Kerr County është më i prekur me 75 viktima, përfshirë 48 të rritur dhe 27 fëmijë.
Shërbimi Kombëtar i Motit ka paralajmëruar për reshje intensive gjatë ditës, që mund të shkaktojnë përmbytje të reja në zona që tashmë janë të ngopura me ujë.
Vëzhgimi për rrezikun e përmbytjeve mbetet në fuqi për qytetet San Antonio, Austin dhe Kerr County, të paktën deri në orën 19:00 sipas kohës lokale.
Përmbytjet nisën të premten, kur lumi Guadalupe pranë qytetit Kerrville u rrit papritur me 6 deri në 8 metra, duke përmbytur rrugë, ndërtesa dhe duke marrë me vete dhjetëra jetë. Autoritetet federale kanë cilësuar situatën si një katastrofë natyrore me pasoja të mëdha.
Për t’iu përgjigjur kësaj fatkeqësie, presidenti Donald Trump ka shpallur Kerr County si zonë fatkeqësie të jashtëzakonshme, duke hapur rrugën për ndihma federale që do të mbështesin banorët dhe rindërtimin e infrastrukturës.
Ndërsa situata në Teksas mbetet alarmante, reshje të dendura janë raportuar edhe në shtete të tjera si Karolina e Veriut, ku po regjistrohen përmbytje të rënda dhe evakuime emergjente.
