Partia Demokratike ka zgjedhur kryeqytetin për të përmbyllur fushatën elektorale për zgjedhjet e 25 prillit. Demokratët e nisën mitingun me himnin kombëtar dhe më pas fjalën e mori Basha. Nga sheshi “Nënë Tereza”, i cili ishte i mbushur nga mijëra demokratë që qëndrojnë jashtë makinave, Basha deklaroi se edhe pak orë na ndajnë nga ardhja e ndryshimit. Basha e cilësoi të dielën si ditën e çlirimit ku të gjithë do vendosin për ndryshimin.Në shesh shihet një pjesëmarrje e madhe e demokratëve, ndërsa gjithashtu sheshi është i rrethuar nga automjete.
“Kjo mbrëmje shënon fundin e një rrugëtimi që nisëm bashkë pak më parë se një muaj më parë nga ky shesh, që na ka çuar nga Jugu në Veri, në Tropoja në Sarandë, nga Korça në Durrës, cep më cep të Shqipërisë. Të një Shqipërie të mbushur me shpresë dhe gëzimin e fitores që po vjen.
Pas tetë viteve dështim, jo më dëshpërim dhe lot, por gëzim për ditën e madhe që po afron, ditën e fitores së çdo shqiptari, të demokracisë, të Shqipërisë si gjithë Europa duke votuar numrin 9. Ndryshimi është cështje orësh, ai është në këtë shesh, gjokset tuaja, sytë tuaj, ushton numri 9 për ndryshim dhe fitore. Të dielën vjen ndryshimi” tha Basha.
