Publikimi i artikullit nga “Zëri i Amerikës” rreth përgjimeve ku implikohej drejtpërdrejt kreu i Bashkisë së Durrësit për shit-blerje vote, duket se ka pasur një impakt tjetër tek qeveritarët, ndryshe nga çfarë pritej.
Përveç padisë që u ngrit ndaj kësaj mediaje, gazetarja që shkroi shkrimin, Klodiana Lala, nga studio e “A Show” ka folur rreth kësaj ngjarjeje dhe padisë që i është ngritur edhe vet asaj si gazetare.
Shkrimi i realizuar ka treguar hapur ndikimin që ka pasur në zgjedhje krimi i organizuar, lidhje e cila vinte e vërtetuar nga dokumente të prokurorisë dhe jo thjesht fjalë. Megjithatë e ndodhur tashmë para “presionit” të policisë për të treguar se cili ka qenë burimi i saj, ajo ka thënë për Adi Krastën se pavarësisht gjithçkaje nuk ka për ta nxjerrë kurrë burimin e saj.
Adi Krasta: Pse u shkaktua gjithë kjo zhurmë?
Klodiana Lala: E prisja këtë zhurmë! Kjo ndodhi kur unë dhe BIRN u përpoqëm t’i shpjegonim opinionit publik se grupe të caktuara kriminale kishin manipuluar rezultatin e zgjedhjeve, se si i kanë shtrirë thellë tentakulat në shoqërinë shqiptare dhe se krimi ka lidhje me zyrtar jo vetëm të nivelit lokal por edhe qendror.
Adi Krasta: Në 2017 u fol se në dy rrethe, Durrës dhe Peshkopi pati shitblerje të votës, pati ndërhyrje nga figura kriminale dhe në atë kohë qeverisja u tall me reporterët me shqetësimet. Ishte e mjaftueshme kjo për t’i mbyllur hetimet?
Klodiana Lala: Janë dy hetime paralele në Prokurorinë e Krimeve të Rënda, njëra që ka të bëjë me një grup kriminal që vepron në zonën e Durrësit, i kapur gafil në shitblerjen e votës dhe nga ana tjetër një hetim penal për zgjedhjet vendore në 2017 në Dibër, ku fitues doli kryebashkiaku socialist Muharrem Rama. Shitblerja e votës një fenomen shqetësues që nga viti 2005, kam konstatuar problematika. Për ta vërtetuar më duhet të kisha dokumente të Prokurorisë.
Adi Krasta: Klodi vazhdon prokuroria t’ju hetojë?
Klodiana Lala: Prokuroria ka nisur një hetim penal, por nuk më huton fare kjo gjë. Hyj në atë kategori gazetarësh që kanë luftuar fort për të gjetur një dokument zyrtar. Jam e qartë në atë që kam shkruar! Prokuroria ka punën e saj, por para se të hetojë gazetarët për burimet, që e them me bindje të plotë nuk i nxjerr asnjëherë, do të duhet të hetojnë ato dhjetëra mijëra dosje që flenë në Prokurori. Si mundet një prokuror të më kërkojë mua si gazetar llogari për një burim apo shumë burime që s’kam për t’i treguar asnjëherë.
