Përmendin vetëm Bashën dhe jo Metën, kur flasin për përgjimet e Ndrangheta-s. Kjo është vërejtja që i bën Sekretari i Përgjithshëm i PS, Taulant Balla, kryetarit të PD-së Lulzim Basha. Duke komentuar e përgjimet e Antimafias, Balla sulmoi kryedemokratin dhe i kërkoi atij që të përmendë dhe Presidentin Ilir Meta.
Sipas Ballës, në përgjime del dhe presidenti Ilir Meta, por opozita nuk thotë asnjë fjalë për të, por vetëm për kryebashkiakun Erion Veliaj. Në një intervistë televizive, Balla tha se anëtarët e Ndrangheta-s pavarësisht përgjimeve, nuk kanë bërë asnjë investim në Tiranë.
“I përmendur me emër është dhe institucioni i Presidentit të Republikës. Nëse PD ngre gishtin ndaj Erion Veliajt, të ngrejë gishtin edhe ndaj Presidentit të Republikës. Nuk është aspak e vërtetë që në Shqipëri nga ky rrjet të jetë investuar një cent. I vetmi investim është një dyqan rrobash.
Nëse tentohet të gjendet një lidhje politike, ato janë Lulzim Basha, Nard Ndoka. Ky e ka pritur dhe në kongres. Në korrik 2017, gjysmën e qeverisë e kishte Lulzim Basha. Në 2 korrik 2017, Lulzim Basha kishte ministrat teknikë në qeveri.
Apo me presidentin e ke aleat dhe Erionin e kundërshtar dhe ai duhet bërë pis me një histori që nuk ekziston?
Lulzim Basha është një i mbytur që është i gatshëm të bëjë pis dhe të kapet pas çdo dege, por unë po them që nuk ka degë dhe varkë shpëtimi për Lulzim Bashën. Një mashtrues përsëritës që bën cdo gjë për të bërë pis imazhin e Shqipërisë”, u shpreh Taulant Balla. /Gazetareforma.com/
