Rritja e numrit të rasteve të reja me Covid-19 ka bërë që vëmendja të rikthehet te virusi, i cili vijon të jetë mes nesh.
Qeveria duket se po përgatitet për skenarët ekstrem pas rritjeve të rasteve të të infektuarve me Covid 19 dhe shtimit të numrit të personave që janë shtruar në spital.
Së fundmi, në spitalin Covid 1 janë shtuar 30 respiratorë, ku ishte e pranishme edhe ministrja e Shëndetësisë Ogerta Manastirliu.
“Vijojmë të forcojmë kapacitetet e sistemit shëndetësor publik në përgjigjen ndaj COVID-19 dhe kjo ndihmë e vyer e partnerëve tanë me keto pajisje jetëshpëtuese do të forcojë repartet e terapive intensive në vend,” tha Ministrja e Shëndetësisë dhe Mbrojtjes Sociale, Ogerta Manastirliu.
Po ashtu, i pranishëm ishte edhe diplomati zviceran Patrik Meier, i cili tha se këto ventilatorë do të përdoren jo vetëm për pacientët me koronavirus por edhe ata që kërkojnë trajtim intensive oksigjeni.
Nga ana tjetër, Limya Eltayeb Përfaqësuesja e Përhershme e PNUD , tha se “ne të gjithë kemi një përgjegjësi, si individë, të zbatojmë masat e rekomanduara dhe të mbështesin përpjekjet e qeverisë për të frenuar ërhapjen e këtij virusi. Së bashku mund ta mposhtim këtë pandemi”.
Qeveria Zvicerane ka dhuruar 330,000 Dollarë, Qeveria Norvegjeze 3,000,000 Kruna Norvegjeze (afërsisht 300,000 Dollar) dhe PNUD 150,000 Dollarë.
Sot është zgjeruar harta e të prekurve me 28 të prekur në Tiranë, 18 në Shkodër, 10 në Krujë, 8 në Durrës, 7 në Vlorë, 3 në Kamëz, nga 2 raste në Kukës, Elbasan, Fier dhe nga 1 i prekur në Korçë dhe Pukë.
Numri i rasteve aktive në vend është 571 dhe që nga nisja e pandemisë janë infektuar 1,672, kurse numri i viktimave ka shkuar në 37.
