Shqipëria ka zhgënjyer tifozët në pjesën e parë të ndeshjes ndaj Ukrainës, e cila është e fundit në Grupin B1 të Ligës së Kombeve. Në stadiumin “Air Albania”, kombëtarja kuqezi është mposhtur 0-2 në 45 minutat e para.
Në minutën e 5-të, Zinçenko realizoi golin e parë pas një topi të kthyer nga mbrojtja shqiptare. Vetëm pesë minuta më vonë, Jaremçuk shënoi golin e dytë, duke e çuar rezultatin në 0-2.
Pavarësisht përpjekjeve, skuadra e drejtuar nga Silvinjo nuk arriti të ndryshojë rrjedhën e lojës në pjesën e parë.
Kjo humbje e mundshme rëndon pozitat e Shqipërisë, që me 7 pikë renditet e fundit në grup, pas Çekisë (11 pikë), Ukrainës (8 pikë) dhe Gjeorgjisë (7 pikë). Humbja e sotme thellon statistikat negative kundër Ukrainës, e cila ka fituar 5 nga 7 ndeshjet direkte, ndërsa Shqipëria ka arritur vetëm një fitore dhe një barazim.
Golaverazhi i përgjithshëm mes dy ekipeve është 15-6 në favor të ukrainasve.
E vetmja fitore e Shqipërisë ndaj Ukrainës u regjistrua para dy muajsh në transfertë, ku kuqezinjtë triumfuan 2-1. Ndërkohë, Çekia po kryeson ndeshjen kundër Gjeorgjisë me rezultatin 2-0, duke ruajtur vendin e parë në grup.
