Ka përfunduar pa sukses takimi i ditës së sotme mes naftëtareve të Ballshit dhe përfaqësuesve të firmës, e cila pretendon se ka në administrim Uzinën e përpunimit të thellë të naftës në këtë qytet.
Sipas naftëtarëve gjatë takimit përfaqësuesit e firmës kanë dhënë premtime boshe, por që nuk është ofruar asnjë zgjidhje për pagat e prapambetura dhe rifillimin e punës.
Kreu i sindikatës së naftëtarëve, Sokol Dautaj, i pranishëm në takim bashkë me 5 specialistë të tjerë, ka konfirmuar se greva e urisë do të vazhdojë dhe paralel me të edhe protestat përpara uzinës dhe në qytetin e Ballshit.
‘Do vazhdojmë protestat në uzinë dhe në qytet. Takimet janë tentativë për të prishur protestat. Nuk na dhanë asnjë dokument për marrëveshjen. Asnjë dokumet se cilës firmë i përket marrëveshja. Uzina nuk ka pronarë, kërkojmë shpjegim nga shteti’- shprehet Dautaj.
Ndërkohë pjesë e këtij takimi kanë qenë të njëjtët persona, të cilët u afruan në mjediset e uzinës rreth dy muaj më parë dhe që premtuan nënshkrimin e kontratave me punonjësit, proces që nuk u finalizua asnjëherë.
Sipas naftëtarëve, këto takime janë tentativa për të prishur grevën e urisë dhe për të ndaluar protestat e tyre, por pa marrë një zgjidhje konkrete janë të vendosur të vazhdojnë.
Sot në ditën e 17-të të grevës dhe protestës së tyre naftëtarët u futën me forcë në mjediset e uzinës dhe u ndalën edhe përpara godinës së boshatisur të administratës, për të treguar se në uzinë nuk ka kompani private, dhe se janë larguar e aty nuk ka asnjë pronar, prandaj kërkojnë ndërhyrje nga shteti për zgjidhjen e situatës.
