Procesi i votimit për zgjedhjet parlamentare të 11 majit është mbyllur zyrtarisht në orën 19:00 në të gjithë vendin.
Siç parashikon ligji, qendrat e votimit mbeten të hapura vetëm për ata qytetarë që ndodheshin në radhë në momentin e përfundimit të afatit.
Këtë të diel, mbi 3.7 milionë qytetarë kishin të drejtë vote për të zgjedhur 140 deputetët e parlamentit të ri, i cili do të vendosë edhe drejtimin politik të vendit për katër vitet e ardhshme.
Risi e këtij procesi ishte vota e diasporës, e cila u përfshi për herë të parë në mënyrë të organizuar, me rreth 246 mijë emigrantë të regjistruar për të votuar.
Sipas të dhënave të fundit nga Komisioni Qendror i Zgjedhjeve, pjesëmarrja në nivel kombëtar deri në orën 18:00 ka arritur në 41.36%, bazuar në raportimet nga 3878 prej 5225 qendrave të votimit në total.
Gara zgjedhore përfshinte 11 subjekte politike tre koalicione dhe tetë parti të vetme me kandidatë në lista të hapura dhe të mbyllura, në varësi të zonave.
Procesi në tërësi u zhvillua i qetë, megjithëse nuk munguan incidentet e izoluara. Në disa zona u raportuan përplasje mes komisionerëve, fotografim i fletëve të votimit apo vonesa në hapjen e qendrave.
Ngjarja më e rëndë u regjistrua në Vorë, ku sekretari i Përgjithshëm i Partisë Demokratike, Flamur Noka, u përfshi në një debat verbal me dy shtetas të cilët më pas u proceduan penalisht.
Policia e Shtetit angazhoi mbi 5000 efektivë në terren për garantimin e rendit dhe sigurisë gjatë procesit zgjedhor, në të gjitha qendrat e votimit dhe zonat e administrimit të votave.
Tashmë, vëmendja është zhvendosur te procesi i numërimit, i cili do të zhvillohet në 93 Komisione Zonale të Administrimit Zgjedhor të shpërndara në të gjithë vendin.
