Ditën e djeshme u zhvilluan zgjedhjet e pjesshme vendore, përkatësisht në gjashtë bashki të vendit, atë të Vorës, Shkodrës, Durrësit, Dibrës, Lushnëjs dhe Rrogozhinës.
Tashmë ka dalur rezultati final edhe në bashkinë e Lushnjës ku ka fituar kandidatja e Partisë Socialiste.
Në përfundim të numërimit të 157 kutive të votimit, ka rezultuar fituese kandidatja e PS, Eriselda Sefa.
Pas fitores në zgjedhjet e 6 marsit, Kandidatja e PS në Lushnjë, Eriselda Sefa, ka dhënë mesazhin e pare.
Sefa ka falënderuar të gjithë qytetarët e Lushnjës, që e kanë votëbesuar, si dhe ata që kanë votuar kandidatët rivalë, duke iu thënë se do ta kenë derën e bashkisë të hapur të gjithë.
“Dua të shprehe falënderime dhe mirënjohje për të gjithë qytetarët e Lushnjës, që më votëbesuan. Falënderoj ata që administruan procesin zgjedhor të të gjitha ngjyrimeve politike. Alternativat që shpreha gjatë fushatës, do të vihen në zbatim gjatë këtij viti. Por, edhe qytetarët që mbështetën alternativën tjetër, ju them se do të gjejnë mbështetje pranë Bashkisë Lushnjë. Jam vërtetë mirënjohëse për gjithë këtë votëbesim”, tha Sefa.
Kujtojmë që në Vorë, ku votimi dhe numërimi ishte elektronik u shpall fitues kandidati i PS Blerim Sheraj. Edhe në Rrogozhinë ka fituar kandidati i PS, Edison Memolla.
Theksojmë se Sheraj ka siguruar një avantazh të thellë përballë rivalëve të tij, pasi ka marrë 7530 vota, ndërsa Lulzim Vrana i Shtëpisë së Lirisë ka marrë 2598 vota dhe Ymer Marku i PD 687. Ndërkohë, ka pasur edhe qytetarë që dhënë opsionin ‘asnjë’, ndërsa të tilla kanë qenë 209 vota.
