Para pak kohësh, Prokuroria e Posaçme (SPAK) arrestoi ish-ministrin e Mjedisit Lefter Koka. Ai akuzohet për përfshirje në çështjen e inceneratorëve. Kohët e fundit, ish-ministri i Mjedisit, Lefter Koka ka kërkuar lirinë në Apel.
Lefter Koka, i cili sipas hetimeve përfitoi 3.7 mln euro nga afera me inceneratorët, ka depozituar kërkesën për liri në gjykatën e Apelit të Posaçëm. Ndonëse ka një javë që është arrestuar, Lefter Koka ka deklaruar se nuk i shmanget hetimeve pasi sipas tij nuk ka shkelur asnjë ligj dhe nuk është person i rrezikshëm.
Në letrën e tij thuhet:
Më lironi, s’kam shkelur asnjë ligj, s’jam i rrezikshëm dhe nuk i shmangem hetimit dhe jam gati të bashkëpunoj me drejtësinë.
Ndërkohë SPAK e akuzon Lefter Kokën për shpërdorim të detyrës, pastrim të parave dhe gjithashtu për korrupsion. Mediat mësojnë se krahas Kokës ka edhe disa persona të tjerë të arrestuar për të njëjtën akuzë. Ministri Koka akuzohet për “korrupsion” dhe “shpërdorim detyre”.
Hetimet e SPAK kanë të paktën dy vite që kanë nisur. Ishte PD që depozitoi në Prokurorinë e Posaçme çështjen e inceneratorëve, në të cilën implikohej Lefter Koka. Para disa muajsh, kryetarja e LSI, Monika Kryemadhi akuzoi publikisht ish-ministrin se kishte firmosur për të realizuar projektet e inceneratorëve në Elbasan, Fier dhe Tiranë.
