Ato duket se po thyejnë një rekord duke “lozur” në të njëjtën kohë me jetën e tyre, pasi sot janë në ditën e 24-t të grevës së urisë.
Është fjala për gratë naftëtare të ish-uzinës së Ballshit, të cilat edhe pse në një gjendja shëndetësore dhe psikologjike tepër të rënduar , janë të vendosura për sakrificë.
Mësohet se njëra prej grave grevistë ka tentuar mbrëmjen e së premtes të presë damarët, për t’i dhënë fund jetës, por nuk është lejuar nga shoqet në momentin e fundit.
“Jemi të pashpresa dhe shteti na ka braktisur, – tha njëra prej tyre. – Kam marrë thikën mbrëmë, po një shoqe më ndali… Nuk e di ku i shkon mendja Kryeministrit, po ne nuk jemi këtu për show. Na kanë braktisur”.
‘Njëra prej nesh tentoi të vrasë veten, e ndaluam të priste damarët. Nuk kemi më shpresa, shteti na ka braktisur. Meta ishte në Bylis, mund të kishte ndaluar te ne ’.- shprehet shoqja e saj.
Naftëtarët e uzinës në Ballsh kanë hyrë në një grevë urie prej 22 ditësh, ndërsa prej 24 ditësh atyre iu janë bashkuar edhe gratë e tyre. Grevistët kërkojnë marrjen e masave urgjente nga qeveria për të siguruar pagesën e 9 muajve rrogë që e kanë fituar në gjykatë, rinisjen e punës dhe njohjen e librezave të punës ku shënohen sigurimet shoqërore dhe vitet e punës.
Gjendja e tyre sa vete dhe rëndohet, ndërsa ata refuzuan edhe thirrjen e kryeministrit Edi Rama, i cili kërkoi ndërprerjen e grevës dhe nisjen e dialogut me qeverinë, por pa zgjidhje konkrete.
/GazetaReforma.com/
