Pas më shumë se dy muajsh bllokadë të plotë izraelite, OKB ka nisur më në fund shpërndarjen e ndihmave humanitare në Rripin e Gazës.
Ngarkesa e parë, me rreth 90 kamionë ndihma, është futur të mërkurën nëpërmjet pikës kufitare të Kerem Shalom dhe është shpërndarë në territorin palestinez, konfirmoi zëdhënësi i Sekretarit të Përgjithshëm të OKB-së, Stephane Dujarric.
Izraeli deklaroi se vetëm gjatë së mërkurës janë lejuar të futen 100 kamionë me furnizime bazë, përfshirë miell, ushqim për fëmijë dhe pajisje mjekësore, ndërsa një ditë më parë ishin lejuar 93 dhe të hënën vetëm 10.
Megjithatë, pjesa më e madhe e këtyre ngarkesave nuk kanë dalë ende nga zona e shkarkimit në Kerem Shalom për shkak të pasigurisë dhe frikës nga grabitjet, për shkak të krizës ekstreme që përjeton popullata.
Dujarric e përshkroi këtë ndihmë si “një pikë uji në oqean”, duke kujtuar se para fillimit të luftës, në tetor 2023, Gaza priste rreth 500 kamionë ndihmash në ditë.
Ndërkohë, që prej 18 marsit, Izraeli ka rifilluar ofensivën e tij ushtarake në Gaza, duke marrë kontrollin e zonave të reja dhe duke ndjekur planin e shpallur nga qeveria për “pushtimin” e plotë të territorit palestinez dhe zhvendosjen e pjesës më të madhe të popullsisë 2.4 milionëshe.
Pavarësisht fushatës intensive, mbrëmjen e djeshme, kryeministri Benjamin Netanyahu deklaroi se është i hapur për një “armëpushim të përkohshëm” në këmbim të lirimit të pengjeve që mbahen nga Hamasi.
Sipas tij, 20 nga 58 pengjet që ndodhen ende në Gaza janë “me siguri” gjallë. Ai përsëriti gjithashtu synimin që ushtria izraelite të marrë kontrollin e plotë të Rripit të Gazës pas përfundimit të operacioneve.
Netanyahu shtoi se është thelbësore të shmanget një krizë humanitare për të ruajtur lirinë e veprimit të Izraelit në terren, një deklaratë që vjen mes presionit në rritje nga bashkësia ndërkombëtare për mënyrën e trajtimit të luftës dhe ndihmës humanitare në Gaza.
