Me rastin e finales së “Conference League” qeveria ka vendosur që data 25 maj të jetë ditë pushimi zyrtar për administratën publike.
Ky ka qenë vendimi që mori sot Këshilli i Ministrave, ndërsa ishte ministri i Brendshëm, Bledi Çuçi që bëri njoftimin.
Sipas Çuçit, pushimi do të bëhet në kuadër të masave për këtë event të madh sportiv për vendin tonë.
“Data 25 të shpallet ditë pushimi për të gjitha institucionet publike që janë pjesë e qarkut të Tiranës, do të jetë pushim për këtë qark. Kjo masë merret si masë për një ngjarje siç është finalja e konferencës së Ligës, ku presim një fluks të njerëzve që vijnë”, u shpreh Çuçi.
Vlen të theksojmë se me datë 25 maj do të mbahet ndeshja ‘Roma-Face Feyenoord’ në stadiumin “Air Albania”, Tiranë.
Në kuadër të mbarërvajtjes dhe ruajtjes së qetësisë për finalen e ‘Conference Leaguen’ policia e shtetit po merr masa.
Disa ditë më parë, zv.drejtori i Përgjithshëm i Policisë së Shtetit, Albert Dervishaj në një deklaratë u shpreh se janë marrë të gjitha masat për ndeshjen dhe për aktivitetet që do të zhvillohen.
Lëvizja e sportdashëve të ekipit të futbollit të Feyenoord drejt stadiumit do të bëhet e grupuar në këmbë nga “Fan Zona” tek pedonalja “Toptani”, përgjatë bulevardit “Deshmorët e Kombit”, në rrugën “Gjergj Filipi”, ndërsa ajo e sportdashësve të ekipit të futbollit të Romës drejt stadiumit do të bëhet e grupuar në këmbë nga “Fan Zona” tek Amfiteatri në kodrat e Liqenit Artificial, sheshi “Chopin”, rruga “Lek Dukagjini”.
