Sipas disa raporteve ndërkombëtare, ekonomia e Shqipërisë do të goditet rëndë këtë vit për shkak të masave kufizuese të marra nga qeveria ndaj parandalimit të koronavirusit.
Sektorë si turizmi, industria e transporteve, shërbimet si baret e restorantet kanë pësuar një krizë të thellë.
Por duhet thënë se këto sektorë janë ndër më kryesorët që “mbajnë në këmbë” ekonominë në Shqipëri.
Qeveria ka vendosur një seri masash lehtësuese prej pak ditësh, por sërish është shumë pak për bizneset.
Eksperti i ekonomisë Pano Soko, në një intervistë në “A2CNN”, tregohet skeptik për ekonominë e vendit tonë dhe për masat e qeverisë, të cilat sipas tij e kanë përkeqësuar situatën.
“Ne u treguam shumë të ashpër me masat, po përshembull fashat orare, në vend të distanconin kanë grumbulluar njerëzit, dhe është arsye pse konsumi është në pikiatë.
Njerëzit nuk kishin kohë të blinin asgjë përveç ushqimeve, madje edhe sot që dyqanet e tjera po hapen, ata nuk kanë kohë të shkojnë se shkelin rregullin e fashave dhe bizneset mbyllen”, shprehet eksperti Soko.
Sipas këtij të fundit masa e ndikimit te buxheti i shtetit pritet të jetë rreth 600 milionë dollarë.
E projektuar në vende pune, sipas tij kjo shifër përkthehet në rreth 240 mijë vende pune teorike që humbasin.
Për Sokon, “lufta” e vërtetë e biznesit fillon tani, dhe se efektet që nuk janë të dukshme në këtë moment, do të qartësohen në shtator.
Sipas tij, qeveria duhet të shtyjë njerëzit të shpenzojnë, dhe të kenë besim në të ardhmen, sepse mungesa e qarkullimit të parasë po paralizon konsumin.
Po ashtu, sipas Sokos, linja e dytë e garancisë sovrane nuk i jep lehtësimin e duhur bizneseve.
“Shteti merr 40% të riskut, por nuk është diçka e madhe, sepse bankat do te jenë gjithsesi të kujdesshme, duke parë situatën e bizneseve.
Është ndihmë garancia? Nuk besoj, se po të ishte, bankat kanë vetë kolaterale.
Do të ishte ndryshe sikur shteti të paguante normën e interesit, ose të garantonte 100% të riskut”, shprehet skeptik eksperti i ekonomisë Pano Soko.
