Kreu i grupit të socialistëve, Niko Peleshi, iu është përgjigjur opozitës, e cila ka pretenduar se është shkelur ligji dhe se ata janë përjashtuar nga Kuvendi, duke u mbështetur në vendimin e gjykatës që rrëzoi dënimet e Kuvendit.
Peleshi i ka kërkuar opozitës të ndajnë mendjen dhe të tregojnë një qëndrim të qartë në lidhje me vendimet e gjykatave, duke u shprehur se ata duhet të vendosin nëse do t’i pranojnë apo t’i kundërshtojnë të gjitha vendimet gjyqësore, duke shmangur dy standardet.
Në fjalën e tij nga foltorja e Kuvendit, Peleshi theksoi se mazhoranca mund të mos jetë dakord me vendimin e Gjykatës Administrative për uljen e dënimit të deputetëve të përjashtuar, por kjo nuk do të thotë se do të reagonte në mënyrë të dhunshme, duke djegur karriget siç bëri opozita pas një vendimi të ngjashëm.
Ai e theksoi se opozita duhet të tregojë qëndrim të njëjtë për të gjitha vendimet e gjykatave, në vend që të mbajë qëndrime të ndryshme sipas interesave politike.
