Pedagogët e UT-së vendosën që t’i japin vetëm një javë afat kohor qeverisë që të anulojë ligjin për arsimin e lartë si dhe rishikimin e VKM-ve.
Gjatë mbledhjes së zhvilluar paraditen e sotme në Godinën Iliaria, mes Senateve Akademik, ata thanë se në rast se qeveria nuk do t’i pranojë kërkesat e tyre, do të vazhdojnë bojkot pa afat të mësimit si dhe grevë të përgjithshme.
Nga ana tjetër pedagogu Mark Marku bëri thirrje për të reaguar pasi nuk mund të lejohet askush që të cënojë dinjitetin e tyre.
“Sot me VKM-të jemi shndërruar në një universitet pa kurrfarë autonomie universitare dhe lirisë akademike. “A do ta pranojnë ne këtë? Ky është një test për ne. A jemi ne një trupë e vdekur siç shpreson qeveria dhe uron që të jemi? A do të kemi forcë reaguese ta refuzojmë këtë gjëndje? Unë mendoj që po është koha. I kemi të gjitha mundësitë dhe nuk kemi pse të kemi frikë. Nuk ka arsye që një pedagog dhe një njeri i lirë të ketë frikë. Ne duhet të kemi frikë nga frika dhe unë i bëj thirrje të gjithëve të reagojmë sepse kemi dinjitetin dhe duhet ta mbrojmë dhe nuk duhet të lejojmë askënd që të na cënojë,”-tha ai.
