Në lidhje me proetstën e pedagogëve që po zhvillohet sot ka reaguar vetë kryeministri Rama. Ai ka thënë se pedagogët kanë shumë mundësi për të disafishuar pagën e tyre.
“Atyre që dalin në rrugë dhe le të dalin se janë në të drejtën e tyre dhe që kërkojnë rritje pagash në emër të të gjithë pedagogëve, ju them se nuk jeni mësues, as mësues gjimnazi e as mësues 9 vjeçareje. Nuk jeni as mjekë e as infermirë në shërbimin shëndetësor public. Nuk jeni as policë, as ushtarak e as nëpunës civilë. Nuk jeni as pensionistë jo e jo. Të gjithë këta marrin një pagë fiks. Ndërkohë, pedagogët janë në një hapësirë të ndërmjetme midis mbështetjes së shtetit dhe horizontit ku mjafton të duash dhe ja bën vetes rrogën edhe rrogën dyfish, trefish, edhe katër edhe pesë. Me fondet e tjera, janë fondet e vetëfinancimit, janë fondet europiane janë edhe fondet e universiteteve të tjera private. Por këtu ka një histori tjetër, të pagave të deklaruara pjesërisht”, deklaroi Rama.
Gjithashtu kryeministri pranoi një rritje prej 7%, që në fakt është një masë shumë larg kërkesave të pedagogëve.
“Do të bëjmë një rritje pagash të mërkurën a të enjten prej 7% por do i njohim universitetit të drejtën për të rritur pagën sipas vendimmarrjes së vet. Nuk janë të gjithë njësoj. Universiteti është autonomy. Zhvillohet në një hapësirë të ndërmjetme mes shtetit dhe tregut”, shtoi më tej kryeministri.
