Kreu i Partisë Demokratike Lulzim Basha ka zhvilluar një takim mëngjesin e sotëm me kryetarin PDIU, Shpëtim Idrizin. Fokusi i takimit ishte marrëveshja për listat, teksa PD ende nuk ka gjetur marëveshje me PBDNJ, PDIU dhe PR.
I pyetur se ku do të kandidojë, Idrizi u shpreh se do të jetë në Tiranë, pasi aty e ka zhvilluar gjithë aktivitetin e tij politik.
“Unë padyshim, për shumë arsye, preferoj të jem në Tiranë, pasi këtu e kam zhvilluar gjithë aktivitetin tim. Këtu jam lindur, këtu jam rritur. Besoj se do të jem në Tiranë”, u shpreh ai.
Kreu i PDIU-së theksoi po sot se nuk ka asnjë dyshim që partia që ai drejton do të jetë në krah të PD-së dhe do të ketë një marrëveshje lidhur me zgjedhjet e 25 prillit.
Gjithashtu më vonë pritet të jetë rradha e kryetarit të Partisë Republikane, Fatmir Mediu që do të zhvillojë takimin me Bashën.
Pjesë nga fjala e Shpëtim Idrizit:
“Janë diskutime që bëhen për të përcaktuar valencat, por edhe sinergjitë e nevojshme. Nuk ka asnjë dyshim që PDIU do të jetë në krah të PD dhe do të ketë një marrëveshje, kjo është e qartë dhe nuk ka dyshim. Ne po bëjmë një dyshim shumë më të gjerë se sa kaq. Kjo është një listë e opozitës së bashkuar. Ne po vendosim piketat në ato zona ku PDIU ndihmon për të prodhuar mandate për listën e opozitës së bashkuar. Sigurisht që edhe për PDIU, edhe për partitë e tjera, është dizenjuar një marrëveshje, do të ketë një moment të nënshkrimit të saj. Ndaj dhe them që nuk ka dyshim që do të ketë një marrëveshje. Nuk bëhet fjalë për vende të sigurta apo të pasigurta, por për pozicione, ku valenca e PDIU është e qartë dhe ndihmon për mandate”, tha Idrizi.
