Opozita dhe maxhoranca janë ulur sot në tavolinë, ku kanë arritur në konsensus për Reformën Zgjedhore.
Palët ranë dakord që reforma të bëhet me konsensus dhe të ‘nxirret’ nga Kuvendi, për të marrë pjesë dhe opozita jashtëparlamentare.
PS përfaqësohej nga Damian Gjiknuri, PD nga Oerd Bylykbashi dhe LSI nga Petrit Vasili.
Po ashtu, në tryezën e bisedimeve ishte edhe Rudina Hajdari, si përfaqësuese e grupit parlamentar demokrat.
Ajo që shkaktoi debate të shumta, sidomos nga mbështetësitë e PD, është fakti që Oerd Bylykbashi u ul në një tavolinë me Damian Gjiknurin.
Ky i fundit është akuzuar nga PD për vjedhje votash.
Së fundmi, gazetari Robert Rakipllari i ftuar në “Opinion”, zbuloi se pas pajtimit të palëve fshihey një ndërkombëtar.
Ky person sipas tij është ambasadori i Britanisë së Madhe në Tiranë, Duncan Norman.
“Bazamenti i gjithë kësaj historie është rezoluta e Bundestagut gjerman. Është negociuar mes të djathtës e të majtës së Bundestagut gjerman. Unë di që në një tryezë që është bërë për Reformën Zgjedhore në Sheraton me përfaqësuesit e komisionit të reformës ku ka shkuar edhe përfaqësuesi i opozitës së bashkuar z.Ivi Kaso, ka pasur një ndërmjetësim të fortë amerikan. Z.Palmer ka pasur bisedë telefonike me z.Basha që opozita të jetë e përfaqësuar në atë tryezë dhe procesi ka vijuar më tej me ndërmjetësim ndërkombëtar. Së fundmi, negociatori kryesor që ka ulur palët në tryezë është ambasadori britanik në Tiranë”, u shpreh Rakipllari.
