Edhe pse mund të jetë një e mirë e madhe e përbashkët, mesa duket Partia Demokratike nuk ka për të pranuar asgjë që përfshin edhe qeverinë.
Mbrëmjen e sotme ka qenë Sekretari i Përgjithshëm i Partisë Demokratike, Gazmend Bardhi, i cili ka thënë se PD nuk do ta njohë garën që do të zhvillohet për Prokurorin e Përgjithshëm.
Nga studio e “A2 CNN” ka thënë se nuk kanë ndërmend të bëhen pjesë sepse trupa e KLP-së nuk plotëson kriteret ligjore dhe kryetari i KLP-së, Gent Ibrahimi është “eksponent shumë i afërt i Partisë Socialiste”.
Gjithashtu ka rikthyer edhe një herë në kujtesë kohën kur Ibrahimi dhe vetë Bardhi kanë përfaqësuar dy partitë më të mëdha në vend, përkatësisht PS dhe PD, në komisionin e reformës ne drejtësi.
“Nuk ka rëndësi kush do të jetë Prokurori i ri i Përgjithshëm, kur e gjithë trupa që do të kryesojë procesin për Prokuror të Përgjithshëm është konsideruar një trupë me anëtarë që nuk plotësojnë kriteret ligjore. E gjithë kjo vendos në pikëpyetje procesin dhe vendimmarrjen.
Duke nisur nga Kryetari i KLP. Ai është cilësuar nga ONM si një kandidaturë që nuk duhet të përfshihej në garë për të qenë anëtar i KLP, sepse nuk plotëson kriteret kushtetuese dhe ligjore. Nuk po i hyj fare lidhjeve me Partinë Socialiste. Ju e mbani mend që ka qenë përfaqësues i qeverisë në Komisionin e Reformës në Drejtësi. Unë, bashkë me disa kolegë ishim përfaqësues te PD, zoti Ibrahimi, me disa kolegë të tij ishin përfaqësues të qeverisë apo PS” –tha Bardhi.
