Partia Demokratike ka filluar përgatitjet për zgjedhjet e 11 majit, me fokus të veçantë tek organizimi i brendshëm dhe mobilizimi i mbështetjes.
Kreu i grupit parlamentar të PD, Gazment Bardhi, ka njoftuar mbledhjen e grupit parlamentar që do të zhvillohet nesër në orën 14:00. Një nga çështjet kryesore të diskutimit do të jetë angazhimi për votën e diasporës, për të cilën drejtuesve të partisë do t’u kërkohet të intensifikojnë punën.
Në orën 17:00, kreu i PD, Sali Berisha, do të zhvillojë një takim me krerët e degëve të partisë në selinë e PD, ku do të diskutohet për terrenin e punës dhe organizimin për zgjedhjet. Gjatë këtij takimi, do të merret gjithashtu një vendim lidhur me procesin e primareve, i parashikuar në Statutin e PD.
Megjithatë, disa funksionarë të PD kanë shprehur kundërshtim ndaj primareve, duke theksuar se ky proces mund të krijojë përçarje dhe ka apeluar për një zgjidhje tjetër. Si shembull, ata përmendin rastin e Bashkisë Tropojë, ku pas përçarjeve të shkaktuara nga primaret, PD humbi këtë bashki.
Një mundësi që Berisha mund të shqyrtojë është përdorimi i votës preferenciale, një proces që do të mundësojë që demokratët të zgjedhin vetë kandidatët e tyre.
