Anduel Tahiraj, deputet i Partisë Socialiste, është denoncuar nga Partia Demokratike në SPAK, nën akuzën për fshehje dhe deklarim të rremë të pasurisë, fshehje të të ardhurave, ushtrim të aktivitetit tregtar të paregjistruar, si dhe shpërdorim të detyrës.
Klevis Balliu, Koordinator Rajonal i PD për Tiranën, deklaroi për mediat se, kur shikon listën e shkeljeve, imazhi që krijohet nuk i përket një deputeti, por një personi me profil kriminal, të cilit i përshtatet një veprimtari e tillë.
Rama kështu i preferon deputetët, sa më antiligjorë, sa më kriminelë duke filluar nga tipologjia Tahiraj e deri te tipat si Çyrbja.
Nëpërmjet deputetëve të opozitës investigimi për deputetin e Ramës është konkretizuar në një kallëzim penal në SPAK, të cilit i kërkojmë të bëjë detyrën që i kërkon ligji.
Sidomos t’i trajtojë si të barabartë të gjithë deputetë, jo të arrestojë dhe të burgosë pa prova ata të opozitës dhe të lërë të lirë me një mal provash ata të qeverisë”, tha Balliu.
Në vijim, ai u shpreh se për njerëzit e PS-së ka arrestime sa për show ndërsa për kundërshtarët politikë të qeverisë burgosje pa prova dhe arrestime që i bëjnë të duken si rrëmbime për të trembur njerëzit.
“Edi Rama mund të shfajësohet për hajdutët që mbledh rreth vetes, duke pretenduar se nuk e di kur i hanë kumbulla pas shpine, por një pyetje mbetet pa përgjigje.
Si ka mundësi që ky zotëria shkon e gjen vetëm ata që vjedhin e vrasin? E ndjekin ata këtë apo i gjen ky vetë, se të tillë i duhen dhe të tillë i pëlqejnë?”, tha Balliu.
