Partia Demokratike dorëzoi sot në Prokurorinë e Posaçme një kallëzim për koncesionin e check-up-it.
Ndër personat e akuzuar nga demokratët ishin edhe ish-ministri i Shëndetësisë, Ilir Beqaj dhe ajo aktualja, Ogerta Manastirliu.
Mbi ta rëndojnë 7 akuza, duke filluar që nga shpërdorimi i detyrës e deri të korrupsioni pasiv.
“A2” shkruan, se SPAK po mendon të bashkojë koncesionin për check-up-in me atë të sterilizimit, të bërë pak muaj më parë nga “Nisma Thurje”.
Të dy këto kallzime kanë si emërues të përbashkët ish-ministrin e Shëndetësisë Ilir Beqaj.
“Janë dy raste të ndryshme që mund të bashkohen në një procedim. Por është herët për ta vendosur”, tha burimi në SPAK
Demokratët këmbëngulin, se ka prova për shkelje e ligjit, në procedurën e dhënies me koncesion, përzgjedhjes së fituesit dhe zbatimin e kontratës.
Në kallëzimin e firmosur nga Sekretari i Përgjithshëm i PD, Gazment Bardhi, thuhet se Ministria e Shëndetësisë ka shpallur fitues ofertuesin më të lartë, duke sjellë një dëm të lartë financiar për Buxhetin e Fondit të Sigurimit të Detyrueshëm Shëndetësor.
