Pas bërjes publike të mendimit të tij se nuk pranon të djegë mandatin e deputetit, Myslim Murrizi ka marrë edhe përgjigjen nga Kryesia e Partisë Demokratike.
E mbledhur ditën e sotme për të folur për protestat, Kryesia ka marrë edhe një vendim tjetër në mënyrë unanime, përjashtimin e deputetit të Lushnjës nga radhët e partisë për votimin kundër djegies së mandatit.
Megjithatë duket se Murrizi e priste këtë gjë dhe për mediat tregon se nuk ka qenë e para masë e marrë kundër tij.
Për Opinion.al, ai ka thënë se s’mund të priste diçka më tepër, pasi vendimi është marrë nga katër drejtues të cilët janë bij ish- komunistësh.
“Nuk është hera e parë që merret një vendim i tillë ndaj meje. Kjo është frymë e partisë të lidhur me Sigurimin, që sillen në këtë formë kur nuk u vjen pas avazit. Pse nuk u mor një vendim i tillë për Mesila Dodën dhe Shpëtim Idrizin që morën votat e demokratëve në vitin 2013. Unë nuk pres tjetër vendim nga katër ish bij sekretarësh komunistë”, tha Murrizi.
Megjithatë mesa duket , tashmë ish-deputeti i PD-së nuk do të shfaqet me asnjë parti, por sipas tij do mbrojë atë për të cilën është zgjedhur.
“Unë do jem aty si përfaqësues i elektoratit tim dhe i studentëve të dhjetorit që u ngritën dhe thanë e duam Shqipërinë si Evropa dhe Amerika”, ka thënë ai.
