Zëdhënësja e Partisë Demokratike, Ina Zhupa, ka denoncuar në faqen e saj zyrtare në rrjetin social “Facebook”, se ka rënë tavani në një dhomë të Pediatrisë së Tiranës, duke plagosur një fëmijë. Zhupa publikon foto, ku shihet suvaja e rënë, ndërsa thekson se duhet hetim dhe vënia para drejtësisë e përgjegjësve.
Denoncimi i Ina Zhupës – “1 qershori ne Pediatrine Tirane! Kushtet e spitaleve skandaloze te shendetesise rrezikuan edhe jeten e femijeve. Tani ne spitalin e pediatrise sapo u plagos nje femije nga renia e tavanit. Duhet hetim dhe venia para drejtesise te atyre qe rrezikojne jeten e femijeve pikerisht ne vend ku duhet te shpetojne jeten dhe shendetin”, shkroi Zhupa.
Kjo ngjarje e rëndë, ka ndodhur pikërisht në ditën e fëmijëve, 1 qershor. Për fëmijën e plagosur, duhet të ishte ditë feste, por për fat të keq, është dëmtuar fizikisht. Nuk është hera e parë që spitalet në Shqipëri shfaqin probleme të tilla dhe shumica prej tyre, janë bërë për t’u restauruar plotësisht.
Megjithatë, shteti vazhdon të bëjë një sy qorr e një vesh shurdh për këtë problematike, që vë në rrezik jetën e pacientëve, që u drejtohen dyerve të spitaleve për t’u shëruar, e jo për t’u dëmtuar edhe më tepër.
