Anëtarët e Komisionit të Ligjeve të Partisë Demokratike, të kryesuar nga Lulzim Basha kanë depozituar sot në Gjykatën Kushtetuese ankimimin e ligjit për Komisionet Hetimore.
Lidhur me këtë ankesë të PD-së ka folur deputetja Dhurata Çupi, e cila shprehet se pret që Kushtetuesja të jetë në lartësinë e integritetin që përfaqëson.
“I bëj thirrje Kushtetueses të jetë në lartësinë e integritetin që jep posti i anëtarit të GJK. Ju kujtoj se nuk janë strukturë e PS-së por është një institucion që duhet të këtë integritetin e institucionit që përfaqësojnë. Ka një praktikë që i njohin të drejtën pakicës parlamentare si instrument kontrollit të pushtetit ekzekutiv”, tha Çupi.
Kujtojmë se grupi i opozitës është shprehur kundër miratimit të ligjit dhe dekretimit nga presidenti Begaj, ku kreu i grupit parlamentar të PD-së, Gazment Bardhi, i kërkoi ta kthente në Kuvend për rishqyrtim ligjin.
Sipas Bardhit, hyrja në fuqi e këtij ligji, që në mënyrë antikushtetuese nuk lejon kontrollin efektiv parlamentar nga ana e pakicës, do të cënonte mundësi dialogu mes palëve politike në Parlament, për gjetjen e një zgjidhje mbi situatën e krijuar.
