Gazetarja shqiptare e Radio Televizionit të Kosovës, Ardita Sylejmani ka ndërruar jetë gjatë lindjes.
Lajmi është bërë publik nga drejtori i përgjithshëm i RTK, Ngadhnjim Kastrati.
Sipas mediave kosovare, 33-vjeçarja ka pasur komplikacione gjatë lindjes, por fëmija i saj i tretë ka ardhur në jetë.
Sylejmani ishte e martuar me Shpend Bllacën, i cili është diplomat i Kosovës në Hungari.
Në njoftimin për ndarjen nga jeta të 33-vjeçares, Kastrati nuk e ka fshehur dhimbjen, ndërsa ka vlerësuar dhe rolin e saj në RTK.
Më tej ai ka shprehur ngushëllime për familjarët e ndjerës.
“Ardita dha një kontribut të madh në RTK gjatë tërë kohës sa ka punuar në dhomën e lajmeve. Prandaj, humbja e saj është humbje e madhe për Radio Televizionin e Kosovës. Përkushtimi në punë në secilën detyrë që iu është besuar, si dhe dashuria për profesionin, bëjnë që Ardita Sylejmani – Bllaca të mbetet në kujtesën e familjarëve, miqve dhe kolegëve. Familja Sylejmani, familja Bllaca si dhe kolegë të RTK-së dhe më gjerë pranoni ngushëllimet më të sinqerta për ndarjen e saj nga jeta”, u shpreh Kastrati.
