Gjykata e Posaçme Kundër Korrupsionit dhe Krimit të Organizuar ka vendosur sot të zbusë masën e sigurisë për Armis Stafën, i cili akuzohet nga SPAK për pastrim parash në shërbim të organizatës kriminale të vëllezërve Hajdar dhe Franc Çopja.
Vendimi erdhi pas paraqitjes nga avokati mbrojtës i të pandehurit të të dhënave nga sistemi TIMS, ku evidentohet se gjatë periudhës kur pretendohet se është kryer vepra penale, Stafa nuk ndodhej në Shqipëri.
Sipas këtyre të dhënave, ai ka qenë në Itali nga 19 dhjetori 2019 deri më 30 tetor 2022, ku thuhet se qëndroi për shkak të kufizimeve të lëvizjes të vendosura gjatë pandemisë COVID-19.
Deri në verifikimin e plotë të pretendimeve të mbrojtjes, gjykata urdhëroi lirimin e Stafës nga burgu dhe vendosjen e tij në masën “arrest në shtëpi”.
