Një tjetër krim i është zbuluar Aleksandër Lucës, i cili ndodhet në burg në Greqi, si një nga të akuzuarit për vrasjen dhe hedhjen në det të studentes greke, Eleni Topaloudi, pasi kjo e fundit refuzoi aktin sekual me të.
Mediat greke shkruajnë se shqiptari akuzohet se është i përfshirë edhe në abuzimin e një tjetër vajze, me aftësi të kufizuara.
Ngjarja thuhet se ka ndodhur vetëm 24 orë pas krimit ndaj studentes Topaloudi, që u vra me 28 Nëntor 2018.
Sipas medias greke, gjithçka doli në dritë me arrestimin e një romi, 23-vjeçar, që ka qenë bashkë me shqiptarin teksa kanë abuzuar me vajzën.
Lidhur me akuzën ndaj shqiptarit për vrasjen e studentes ka pasur edhe dëshmi, por edhe kundërshti të forta. Ajo u gjet në det e lidhur, ndërkohë që ekspertiza zbuloi se ajo kishte qenë gjallë kur ishte hedhur nëpër shkëmbinj e më pas poshtë në det, ku gjeti edhe vdekjen e mbytur.
Shoku i shqiptarit, Manolis Koukouras, i arrestuari tjetër për këtë ngjarje të rëndë e ka pranuar se ka qenë i pranishëm, por ia ka kaluar fajin shqiptarit, duke thënë se ai që goditi ishte shqiptari.
