“Dunwell Haberman” është një kompani e njohur për opinionin publik.
Ajo u shpall fituese për ndërtimin e një pjese të Unazës së Madhe, por ky aktivitet u pezullua nga Autoriteti Rrugor Shqiptar pas publikimit të dokumenteve, në emisionin “Të paekspozuarit”.
Pas skandalit, prokuroria nisi hetimet për kompaninë në dhjetor të 2018.
Dokumentet në fjalë ngrinin hije të forta dyshimi se DH Albania është një kompani fantazmë dhe e fitoi garën me dokumente të faksifikuara.
Sipas BIRN, Prokuroria e Tiranës ka mbyllur pa zhurmë hetimin për këtë skandal në fund të 2019.
Ajo ka dërguar në gjykatë si të pandehur vetëm Avdjol Dobin – përfaqësuesin në arrati të kompanisë DH Albania.
Kjo dosje ka mbërritur në gjykatë më 27 dhjetor me akuzën e “falsifikimit të dokumenteve”.
DH Albania u regjistrua në Shqipëri në korrik 2018, si degë e kompanisë amerikane Dunwell Haberman, e themeluar më 25 qershor 2018 në Delawere të Shteteve të Bashkuara- e njohur si parajsë fiskale.
