Ditën e sotme opozita, përkatësisht Partia Demokratike dhe Partia e Lirisë zhvilluan një protestë me pjesëmarrje masive përpara kryeministrisë.
“Shqipëria në Rrezik, T’ia dalim zot bashkë!” bashkoi këtë të shtunë dhjetëra mijëra qytetarë në sheshin poshtë zyrës së Kryeministrit Edi Rama.
Ndërkohë që pasmbylljes së protestës së opozitës, ka ardhur edhe reagimi i parë nga Partia Socialiste. Kryetari i grupit Parlamentar, Taulant Balla, thotë se “Aleanca e Rublave” është e dëshpëruar dhe e tërbuar. Sipas tij, opozita shqiptare kishte porosi nga Moska, që mos të flisnin asnjë fjalë për luftën në Ukrainë dhe këtë urdhër shton Balla e zbatuan me përpikëri “bedelat e Putinit në Tiranë”.
“Aleanca e Rublave është përditë e më e lexueshme, çdo ditë e më e tërbuar, prej sonte edhe më e dëshpëruar! Rublat vazhdojnë të financojnë aleancën, njëlloj si në 2011 kur dhanë votën KUNDËR Kosovës, e vetë Shqipërisë dhe PRO Rezolutës famëkeqe të shkruar në Kremlin, që lemerisi botën me gjoja trajtime çnjerëzore dhe trafiqe organesh nga UÇK! Opozita e rublave është e zhytur aq thellë në thesin e parave ruse. Porosia për sot nga Moska ishte që të mos kishte asnjë fjalë apo zë kundër agresionit rus në Ukrahinë. Dhe bedelat e Putinit në Tiranë e zbatuan. Turp!”, shkruan Balla në “Facebook”.
