Një lajm pozitiv vjen për shqiptarët nga Ministria për Evropën dhe Punët e Jashtme.
Njoftohet se Shqipëria ka arritur një marrëveshje me Arabinë Saudite për njohjen reciproke të lejeve të drejtimit.
Procedurat e marrëveshjes për njohjen reciproke të lejeve të drejtimit mes Shqipërisë dhe Mbretërisë së Arabisë Saudite tashmë janë përmbyllur. Vlen të theksohet se vendimi hyn në fuqi 30 ditë pas firmosjes së marrëveshjes dhe procedurave nga ana e të dy shteteve. Duke nisur që pas një muaji shoferët shqiptarë do munden të lëvizin me automjete edhe në Arabinë Saudite.
Kujtojmë që më herët Shqipëria arriti marrëveshjen që patentat shqiptare të njiheshin në Gjermani. Në baë të këtij pakti midis dy vendeve përfitojnë gati 130 mijë shqiptarë rezidentë në Gjermani.
Njoftimi i Plotë i Ministrise për Evropën dhe Punët e Jashtme:
Përmbyllen procedurat e marrëveshjes për njohjen reciproke të lejeve të drejtimit mes Shqipërisë dhe Mbretërisë së Arabisë Saudite.
Pas përfundimit të procedurave të brendshme ligjore fillimisht nga pala jonë, Ministria e Punëve të Jashtme e Mbretërisë së Arabisë Saudite ka njoftuar përfundimin e procedurave të brendshme ligjore edhe nga pala e tyre.
Marrëveshja, e cila hyn në fuqi 30 ditë pas përfundimit të procedurave, do të lehtësojë lëvizjen reciproke të qytetarëve, vizitorëve dhe turistëve të dy vendeve tona, përmes përdorimit të patentave, si dhe konvertimin e tyre.
