Një zjarr masiv përfshiu mesditën e sotme një sipërfaqe pyjore në Qeparo, duke shkaktuar alarm për banesat dhe një fabrikë vaji në afërsi.
Terreni i thyer dhe erërat e forta ndërlikuan ndërhyrjen, por ndërhyrja e shpejtë nga forcat e emergjencës bëri të mundur shuarjen e plotë të flakëve pas disa orësh.
Ministria e Mbrojtjes bëri të ditur se operacioni për shuarjen e zjarrit përfshiu mjete zjarrfikëse, forca të Mbrojtjes nga Zjarri dhe Shpëtimi, punonjës të shërbimit pyjor, si dhe helikopterin “Black Hawk” të Forcës Ajrore.
Falë bashkëpunimit të ngushtë mes strukturave lokale dhe atyre qendrore të Mbrojtjes Civile, u arrit të parandalohej përhapja e mëtejshme e flakëve dhe të shmangeshin dëmet në banesa dhe pronat përreth.
Autoritetet i bëjnë thirrje qytetarëve të tregojnë kujdes të shtuar, sidomos gjatë ditëve me temperatura të larta dhe erëra të forta, duke kërkuar që çdo vatër e mundshme zjarri të raportohet menjëherë për të shmangur situata të rrezikshme për njerëzit dhe natyrën.
