Mbledhja e mbajtur mbrëmjen e sotme nga anëtarët e Komisionit të Rithemelimit brenda selisë së partisë Demokratike ka përfunduar. Ish kryeministri, Sali Berisha ka dhënë një deklaratë për mediat ku tha se gjatë mbledhjes ishte diskutuar vetëm për çështje organizimi.
Ndërsa u pyet nëse protesta e 8 janarit mund të ishte shmangur në rastin kur hyrja në seli kishte qenë aq e lehtë, Berisha preferoi të shmangej, duke thënë se nuk dëshironte të kthehej mbrapa në kohë por të vijonte përpara.
Ish kryeministri Sali Berisha: Nuk kam asgjë të veçantë t’ju them sepse u morëm vetëm me probleme organizimi të cilat nuk kanë interes as për ju si gazetarë dhe as për ndjekësit.
Vendimmarrja? Është një proces vendimmarje në të gjitha nivelet tani dhe po ecën mjaft mirë. Sot janë marrë vendime për organizimin.
Pyetje: Kur ishte aq e thjeshtë të hynit në selinë e PD a mendoni se mund të ishte shmangur dhuna e 8 janarit?
Berisha: Më ktheni në kohë mbrapa por unë dua të shoh përpara.
Gjithashtu ish-kryeministri Berisha ishte ulur në karrigen ku ulej ish-kryedemokrati Lulzim Basha sa herë që mbaheshin mbledhje.
Anash tij, ishin të ulur edhe anëtarët e tjerë të Komisionit të Rithemelimit ndërsa pritet të diskutohet për procesin e bashkimit të partisë Demokratike.
