Aleanca për Ardhmërinë e Kosovës propozon kryetarin e saj, Ramush Haradinaj për postin e presidentit. Partitë tjera ende nuk kanë paraqitur ndonjë kandidaturë, ndërsa lëvizja Vetëvendosje kërkon që së pari të mbahen zgjedhjet e reja e pastaj të zgjidhet presidenti.
Pas dorëheqjes së presidentit Hashim Thaçi për t’u përballur me akuzat për krime lufte në Hagë, kryetarja e parlamentit të Kosovës, Vjosa Osmani mori përsipër postin e ushtrueses së detyrës së presidentes, që sipas kushtetutës mund ta ushtrojë jo më shumë se gjashtë muaj.
Kryeministri Avdullah Hoti paralajmëroi bisedime me partitë politike për të siguruar pajtimin për presidentin e ri të vendit, zgjedhja e të cilit kërkon dy të tretat e votave në parlamentin 120 vendesh. Në të kundërtën tha ai vendi do të shkojë në zgjedhje të reja.
“Ende nuk kemi filluar konsultimet e brendshme me partitë politike për të parë cili është disponimi. Kemi dëgjuar disponime dhe deklarime publike të partive të ndryshme karshi kësaj teme, po besoj që së shpejti për disa ditë apo javë ulemi të gjitha partitë parlamentare dhe duhet të flasim si njerëz të civilizuar, si parti politike të përgjegjshme për të gjetur zgjidhje për qytetarët”, tha Hoti.
“Pas zgjedhjeve të reja mund të kemi president të ri dhe qeveria e vjetër nuk e ka as legjitimitetin as autoritetin as kredibilitetin për iniciativa të tilla”, tha gjatë fundjavës, kryetari i lëvizjes vetëvendosje, Albin Kurti.
Në Kosovë nga 4 nëntori ka filluar të kalojë afati prej 6 muajsh brenda të cilit vendi duhet të bëhet më president të ri, apo të mbajë zgjedhje të parakohshme parlamentare.
/GazetaReforma.com/
