Pas debateve të shumta dhe përplasjeve në kuvend miratohet data 2 mars për kërkesën e opozitës për mocion me debat, interpelancë urgjente me kryeministrin dhe pyetje-përgjigje për “çështjen” McGonigal. Vetëm se të 3 këto kërkesa do të shqyrtohen në një seancë të vetme, jo të ndara, gjë e cila nuk u prit mirë nga deputetët e opozitës.
Kërkesa u hodh në votim nga drejtuesja e seancës dhe u votua pro nga deputetët e mazhorancës, përveç Erion Braçes, i cili votoi kundër.
Nënkryetarja e Kuvendit Ermonela Felaj, tha se këto tre kërkesa janë bashkuar në një seancë, për shkak se kanë të bëjnë me të njejtën çështje.
“Na lejoni të debatojmë për çështje që kemi bërë kërkesa. Meqë i keni mbledhur bashkë , grupojini në një seancë. Le të mblidhet Konferenca e Kryetarëve”, tha deputetja Tabaku.
” Kryetarja e Kuvendit ka vendosur bashkimin re kërkesës për interpelancë urgjente. Sapo votuam në mungesë të konsensusi të kryetarëve që kanë dijeni që në datën 7 shkurt dhe sot është data 16. Në kushtet kur kërkesa u ripërsërit kryetari i Kuvendit ka të drejtë të propozojë një datë. Në dy mars do të kenë të drejtë të flasin të gjithë”, iu përgjigj Felaj.
Ndërkohë kujtojmë se kryeministri Rama prej disa ditësh tashmë nuk është paraqitur nëpër seancat parlamentare.
