Gjykata e Durrësit ka dhënë këtë të shtunë vendimin për 8 personat e arrestuar pas arratisjes së të dënuarit Altin Ndoci nga IEVP Durrës, duke lënë në burg tre prej tyre dhe duke ndryshuar masat e sigurisë për pjesën tjetër.
Para trupit gjykues u paraqitën 6 efektivë të Policisë së Burgjeve, shefi i komanduar i policisë së burgut dhe kryeinfermier i institucionit, të cilët ishin arrestuar një ditë pas arratisjes së Ndocit, për verifikimin e ligjshmërisë së arrestimit dhe caktimin e masës së sigurisë.
Në përfundim të seancës, gjykata vendosi masën “arrest në burg” për tre nga të arrestuarit. Në qeli u lanë Dezdemont Pazaj, Fation Baçi dhe Sali Ferrollari. Për tre persona të tjerë u caktua masa “detyrim paraqitjeje”, ndërsa për dy të arrestuar u vendos “arrest në shtëpi”.
Fillimisht, prokurori i çështjes kishte kërkuar masën “arrest në burg” për të gjithë të dyshuarit. Gjatë seancës, ai ndryshoi kërkesën për dy nga efektivët e Policisë së Burgjeve, Aranit Çela dhe Preng Marvataj, për të cilët gjykata vendosi masën “detyrim paraqitjeje”. Në të njëjtën masë u la edhe Dorian Saraçi.
Ndërkohë, masa “arrest në shtëpi” u caktua për Violeta Ukën, specialiste e informacionit, si dhe për kryeinfermierin e burgut, Aulon Çuku.
Pas përfundimit të seancës, disa nga avokatët mbrojtës kanë kundërshtuar vendimin e gjykatës dhe kanë bërë të ditur se do ta ankimojnë atë në një shkallë më të lartë gjyqësore.
