Bashkimi Evropian ka reaguar pas publikimit të lajmit se Hashim Thaçi, Kadri Veseli dhe disa luftatërë të tjerë të Ushtrisë Çlirimtare të Kosovës janë akuzuar nga Prokuroria Speciale. Në një reagim për mediat, BE shkuan se janë mbështetës të fortë të punës së Gjykatës Speciale dhe e quajnë si një element i rëndësishëm i rrugës së Kosovës në union.
BE-ja ka thënë se nuk komenton procedurat e Zyrës së Prokurorit Special dhe Dhomave të Specializuara, sa u përket punës së tyre, dhe se këto çështje duhet të adresohen te këta mekanizma.
“Është shumë e rëndësishme që Zyra e Prokurorit Special dhe Dhomave të Specializuara të vazhdojnë të bëjnë punën e vet në mënyrë të pavarur, pa ndërhyrje”, është thënë mes tjerash në reagim.
Ndërkohë zëdhënësi i Bashkimit Evropian, Peter Stano, u tha gazetarëve se blloku evropian është “mbështetës i fortë i punës” së Gjykatës Speciale dhe Prokurorisë Speciale, sepse ato janë “dëshmi e rëndësishme e përkushtimit të Kosovës ndaj sundimit të ligjit”, i cili njëherësh është element kryesor i rrugës së Kosovës në BE.
Presidenti i Kosovës, Hashim Thaçi do të përballet me akuza zyrtare nga Prokuroria Speciale. Kjo vjen sepse në 24 prill 2020, Zyra e Prokurorit të Specializuar u paraqiti Dhomave të Specializuara të Kosovës një aktakuzë me dhjetë pika për shqyrtim prej Gjykatës, ku Presidenti Hashim Thaçi, kreu i Partisë Demokratike të Kosovës, Kadri Veseli dhe të tjerë akuzohen për një sërë krimesh kundër njerëzimit dhe krimesh lufte ndër të cilat, vrasje e paligjshme, zhdukje e detyruar e personave, përndjekje dhe tortura.
