Pas 29 ditësh nga zhdukja, është gjetur trupi i pajetë i Jurgen Karajt, 30 vjeç, nga fshati Fullqet i Klosit. Trupi u lokalizua rreth 30 kilometra larg vendit të aksidentit, përgjatë shtratit të lumi Mat.
Ngjarja ka ndodhur më 10 janar, rreth orës 01:30, në fshatin Darsë të Klos. Automjeti në të cilin ndodheshin Jurgen Karaj dhe shoku i tij, Andi Losha, ka dalë nga rruga dhe ka përfunduar në përrua. Sipas dyshimeve, 30 vjeçari është rrëmbyer nga rrjedha e ujit pas aksidentit.
Që nga dita e ngjarjes, kërkimet janë zhvilluar pa ndërprerje. Në terren janë angazhuar dhjetëra forca të Batalionit të Tretë të Repartit të Këmbësorisë Burrel, familjarë të të riut dhe struktura të tjera të emergjencës. Në operacion kanë marrë pjesë edhe ekipe nga Kosova, të pajisura me mjete dhe pajisje speciale. Gjatë kësaj periudhe është kontrolluar disa herë e gjithë vija lumore e Matit, pa u gjetur trupi deri në ditën e sotme.
Trupi i Jurgen Karajt u gjet në afërsi të fshatit Urakë, gjatë një patrullimi me gomone nga forcat e ushtrisë. Në vendngjarje u nis grupi hetimor për kryerjen e veprimeve procedurale.
Sipas policisë, drejtuesi i automjetit, 24 vjeçari Andi Losha, u largua nga vendi i aksidentit pa njoftuar autoritetet dhe pa i dhënë ndihmë pasagjerit. Ai u arrestua më pas nga policia dhe nga testi i alkoolit rezultoi se e kishte drejtuar mjetin në gjendje të dehur. Hetimet për zbardhjen e plotë të rrethanave të ngjarjes vijojnë.
